Ættarmótinu lokið

Nú er ættarmótinu lokið og viljum við í nefndinni þakka öllum þeim sem lögðu sitt af mörkum til að aðstoða okkur og gerðu ættarmótið að þeirri lukku sem það á endanum varð.
Það rættist heldur betur úr mætingu hjá okkur og er ættin orðin ansi stór. Ef allir mæta á næsta ættarmót þá er alveg ljóst að við verðum að finna stærra húsnæði :)
Niðjatalinu var dreift á laugardagskvöldinu til fjölskyldanna og eruð þið beðin um að uppfæra það þannig að það sé fljótlega hægt að klára það. Það má síðan skila því til Ingu á hásteinsveginn.
Við þökkum Ingu og Óskari kærlega fyrir að bjóða okkur að vera í krónni þeirra á föstudagskvöldinu og einnig fyrir drykkina sem voru í þeirra boði.
Gangan á laugardeginum var mjög fín en veðrið hefði mátt vera betra. Húsnæðið var heldur of lítið fyrir okkur, þar sem skráning jókst síðustu dagana. Við gerðum bara það besta úr þessu, börnum var leyft að borða fyrst og svo fullorðnum. Fólk var almennt ánægt með þetta fyrirkomulag,börnin skemmtu sér vel og fullorðna fólkið náði að spjalla saman. Það var þröngt setið en fólk talaði um að það hefði bara ýtt undir frekari kynni.
Enn og aftur þá þökkum við öllum fyrir komuna og óskum ykkur velfarnaðar fram að næsta ættarmóti en það á víst að reyna að halda það 2012 í Fredrikshavn :) Nýja nefndin veit víst allt um það :)
Bestu kveðjur.

Skemmtiatriði óskast !

Nefndin óskar eftir skemmtiatriðum frá ættingjum.
Því fleiri atriði því betra, það er undir okkur sjálfum komið að skemmta hvert öðru.
Þetta mega vera söngatriði, leikir, töfrabrögð eða annað. Öllum atriðum er vel tekið.
Endilega hafið samband ef ykkur dettur eitthvað í hug, vitið um skemmtilegan leik sem hægt væri að fara í eða eitthvað slíkt.
Þið getið sent línu á [e-mail]

Dagskrá ættarmótsins

Sæl öll,

Hér getið þið séð dagskrá ættarmótsins.

Einhverjir hafa nú þegar greitt á ættarmótið en það er þó nokkrir sem eiga það eftir. Ég bið ykkur því að drífa í að greiða gjaldið svo við getum farið að sjá nákvæma tölu á þeim sem koma, og þá sérstaklega varðandi fjölda gesta í mat.

Allar greiðsluupplýsingar er að finna í færslunni hér fyrir neðan.

Niðjatalið verður uppfært á ættarmótinu. Útprentanir af niðjatalinu frá ættarmótinu 2001 munu liggja fyrir á ættarmótinu, svo fólk getur bætt og breytt. Þessar útprentanir verða síðan teknar saman í lok ættarmótsins og slegnar inn í tölvu og sendar þeim sem þess óska með tölvupósti. Þá hvetjum við alla til þess að skrifa sig í símaskrá og netfangaskrá Andersen ættarinnar. Búin slíkum lista verður umtalsvert auðveldara að skipuleggja næsta ættarmót af næstu ættarmótsnefnd.

Hægt er að niðurhala niðjatalinu hér og í lok þessarar færslu. 

*Föstudagurinn 31. ágúst*
Við ætlum að hittast í krónni í Básum hjá Ingu og Óskari upp úr 20.00. Það er engin formleg dagskrá heldur er ætlunin að fólk hittist og spjalli og endurnýji gömul kynni. Fólk kemur bara í lopapeysunni og þeir sem vilja taka með gítar er það velkomið. Boðið verður upp á súpu og brauð og kaffi og er fólki velkomið að taka aðrar drykkjarvörur með sér. Sumir eru að koma með Herjólfi seinna sama kvöld og þá er ekki langt að fara þar sem króin er á Básbryggju.

*Laugardagurinn 1. sept.*
Kl. 11.00 / / Hittumst á Skansinum en þar stendur norska stafkirkjan og einnig Landlyst sem var endurbyggt. Danski Pétur og Jóhanna bjuggu í Landlyst í nokkur ár og þar fæddust bræðurnir Knud, Njáll og Malli. Við ætlum að ganga þaðan upp í “Sólbakkaskóg” og bæta nokkrum plöntum við.

Frá “Sólbakkaskógi” er ætlunin að ganga niður að uppgreftri hraunsins sem nú stendur yfir eða “pompei norðursins” og ætlum við að skoða það aðeins. Að því loknu verður gengið niður í kirkjugarð að leiði Péturs, Jóhönnu og Möggu á Sólbakka, og vitjum síðan leiða systkinanna frá Sólbakka. Ef tími verður til og veður leyfir ætlum við að fara á stakkó í létta leiki með börnin.

Eftir smá hvíld hvert á öðru, bað og skveringu verður hátíðarsamkoma í Oddfellow þar sem Grímur kokkur mun sjá um hlaðborð. ATH. Fólk tekur með sína drykki. Ætlunin er að hafa myndatöku af fjölskyldunum sama kvöld.

*Sunnudagur 2. september.*
Ættarmótinu er hér formlega lokið en við hvetjum fólk endilega til þess að kynna sér það sem eyjarnar hafa upp á að bjóða. Fiska- og náttúrusafnið (opið 11.00-17.00) Byggðasafnið (opið 13.00-15.00) Margt annað er hægt að gera t.d. fara í siglingu kringum Eyjar, fara í sund, gönguferð út í Brimurð og Klaufina, renna upp á Stórhöfða, ganga á Eldfell, kíkja í Herjólfsdal, heimsækja frændfólkið ofl.

Skrár tengdar þessari bloggfærslu:

• Niðjatal Hans Peter Andersen

Greiðsluupplýsingar

Hér kemur smá leiðrétting á fyrri færslu.
Þeir sem eru fæddir 1990 og fyrr greiða fullt gjald eða 5000 kr. (Fullorðnir)
Þeir sem eru fæddir 1991-1995 greiða 1/2 gjald eða 2500 kr. ( Unglingar)
Þeir sem eru fæddir 1996 og seinna fá frítt.

Vinsamlegast hafið þetta í huga þegar þið greiðið fyrir fjölskyldur ykkar á mótið.

Reikningnúmerið er 303-26-54444
kt: 060473-4989

Þegar þið greiðið þá verðið þið að láta fylgja með kennitölu á greiðanda í skýringu.
Sendið síðan tölvupóst á [e-mail] og [e-mail].

Síðasti greiðsludagur er 15. ágúst.

Ættarmótið nálgast

Það styttist óðum í ættarmótið. Nefndin hefur verið iðin við kolann og þessa dagana má ættfólk okkar eiga von á símtali frá einhverjum af sínum nánustu, sem eru að kanna hvort viðkomandi ætli ekki að skella sér á mótið. Þetta er að sjálfsögðu gert svo hægt sé að gera viðeigandi ráðstafanir fyrir mótið hvað varðar mat, drykk og húsakost.

Búið er að ákveða hvað mótið skuli kosta:

Fullorðnir (16 ára og eldri) > 4.900.-
Börn frá 12 til 16 ára > 2.450.-
Börn yngri en 12 ára > ókeypis

Vonandi eiga sem flestir kost á að mæta.

Dreifið fagnaðarerindinu...

Kæru frænkur og frændur
Nú viljum við biðja ykkur um smá aðstoð.
Ef þið eruð með netföng hjá frænkum og frændum sem eiga að vera á þessu ættarmóti þá megið þið endilega senda póst á þá aðila, sem myndi innihalda slóðina að heimasíðunni okkar þannig að sem flestir fái fréttir af síðunni og geti nálgast upplýsingar um mótið.
Þeir sem fá póstinn þekkja síðan eflaust einhverja aðra sem þeir geta síðan áframsent póstinn á. Með þessu móti aukum við líkurnar á því að sem flestir komist og það verði frábær mæting á ættarmótið.
Bestu kveðjur,
Nefndin.

Ættarmótið helgina 31. ágúst - 2. sept.

Jæja gott fólk.
Þá er búið að taka ákvörðun um tímasetningu á ættarmótinu en það verður haldið helgina 31. ágúst - 2. sept. 2007.
Vonandi fara nú flestir að huga að því að panta með Herjólfi eða flugi og athuga með gistipláss.
Endilega takið frá þessa helgi.
Við í nefndinni ætlum að hittast fljótlega og reyna að finna út kostnað, en honum verður haldið í lágmarki til þess að flestir sjái sér fært að mæta - aðalatriðið er að hitta fólkið sitt og styrkja tengslin.
Fylgist reglulega með á heimasíðunni - við munum fljótlega setja meira hingað inn.

Nefndina skipa:
Sædís Sigurbjörnsdóttir
Halldóra Ólafsdóttir
Ómar R. Valdimarsson
Húnbogi Jóhannsson
Pétur Magni Jóhannesson.

Vísir að ættartölu Andersen-systkinanna frá Sólbakka

Með því að smella tvisvar á skjalið hér fyrir ofan má sjá það í stærri upplausn. 

Kjörsonur Íslands

Hafsteinn Stefánsson orti þessar vísur við lát Danska-Péturs 1955 og birti í fréttablaði þess tíma í Eyjum.

Við þekktum einn karl sem kjörsonur Íslands var
kominn af danskri grund yfir mislynd höfin.
Hinn svefnlétti piltur af samtímamönnum bar
sjómennskan var honum dýrasta vöggugjöfin.

Í Vestmannaeyjum hann lifði og byggði sér bæ
bústýran gaf honum dætur og myndarsyni
heimilisbjörgin var sótt af kappi í sæ
Sólbakkafjölskyldan eignaðist trausta vini.

Með hreinlegum háttum setti á umhverfið svip
syni hvatti til dáða og þörfustu verka
og feðgarnir áttu saman hin fríðustu skip
flotans prýði með örugga drengi og sterka.

Lífsveginn fetaði hik- og hávaðalaust
hreinskiptinn maður, ljúfur í fasi og svörum,
barðist til sigurs og setti ei nökkva í naust
þó næðingur elli og sjúkleika breytti kjörum.

Úr minningabókinni margt er glatað og týnt
merkileg kynni voru þar færð til leturs
komi ég þar sem allt er fágað og fínt
þá finn ég til nærveru gamla danska Péturs.

Andersen-systkinin frá Sólbakka og forfeður þeirra

Ómar Evu- og Valdimarsson flutti þessa tölu á fyrsta ættarmótinu í Eyjum haustið 1983. 

Elstu merki um forfeður okkar á danska ríkisskjalasafninu, þar sem ég sat nokkra daga sumarið 1983 og las gömul manntöl og kirkjubækur, eru úr manntalinu í Fredriksborgar-amt snemma árs 1787. Fjölskylda númer 70 í manntalinu frá Ude Sundby, sem ekki er lengur til formlega þótt hlutar af Oppe Sundby séu nú kallaðir Ude Sundby (þessi pláss eru mjög nærri Fredrikssund) - fjölskylda nr. 70 var vinnumaður og vefari, Wilum Nilausen, 59 ára gamall, kona hans Abelone Jensdatter, sex árum eldri - og nokkurt skass eftir því sem sagan segir - og tvö börn þeirra, Jens Willumsen 22 ára og 17 ára stúlka, Marin Willumsdatter.           

Wilum Nilausen var listfengur maður sem marka má af því að á þessum tíma fengust ekki hvaða menn sem var við vefnað. Til þess þurfti nokkra kunnáttu og lagni, jafnvel þótt ekki hafi verið um eiginlegan listvefnað að ræða. Sonur Wilums, Jens Willumsen, lærði af föður sínum og varð síðar ágætur vefari.           

En þau sæmdarhjón, Wilum Nilausen og Abelone Jensdatter, voru langa langa langa langa langafi minn og amma - sem þýðir að börnin mín eru níunda kynslóð frá Wilum og Abelone. Það má geta þess hér til gamans að í kóngsins Kaupinhafn er bráðskemmtilegt veitingahús sem ber einmitt nafnið Abelone. Og við ættum kannski að hafa í huga er næstu stúlkubörn fæðast inn í fjölskyldur okkar að það eru til fleiri nöfn en Jóhanna, Pétur og Eva - það er til dæmis til nafnið Abelone!           

Samkvæmt þessu manntali virðast þau Wilum og Abelone hafa verið fædd 1728 og 1722. Þau yrðu því 255 ára og 261 árs á þessu ári.           

Við snögga yfirferð var engin frekari merki að sjá um dóttur þeirra Marínu. Ég hef því gengið út frá að hún hafi gifst einhverjum sæmdarmanninum í sveitinni og átt börn og buru. En sautján árum síðar, 1801, var enn á ný talið fólkið í sókninni. Þá var Wilum gamli Nilausen látinn en Abelone orðin 83 ára og búsett á heimili sonar síns, Jens Willumssonar, og konu hans, Önnu Óladóttur (Anne Olesdatter). Strákur hafði farið að dæmi föður síns og kvænst eldri konu því Anna fæddist árið 1764, tveimur árum á undan Jens.           

Jens þessi vann alla tíð hörðum höndum eins og sést best á því að 35 ára gamall var hann ekki einasta vefari heldur og sjálfstæður bóndi í Ude Sundby. Þau Anna hafa gifst í kringum 1790 því þegar manntal fór framn 1801 áttu þau sex börn og var það elsta tíu ára. Það var þó ekki fyrr en árið eftir, nánar tiltekið 7. maí 1802, að næsti forfaðir okkar kom í heiminn því þá fæddust þeim Jens og Önnu tvíburnarnir Anders og Anne Dorthe. Þau fæddust á bænum Bilidt sem fólk á þessum slóðum kannast ennþá við, að minnsta kosti ættingjar okkar í Fredrikssund. Auk fjölskyldunnar, Abelone gömlu, Jens og Önnu og barnanna, sem urðu að minnsta kosti átta, voru á Býlinu tveir vinnumenn, annar unglingur, hinn fullorðinn maður.           

Anders Jensen náði sér síðar í konu frá Krogstrup, sem er þarna í nágrenninu, Sidse Hansdatter, árinu yngri en hann var sjálfur. Framan af bjuggu þau í Ude Sundby og eignuðust þar að minnsta kosti sjö börn. Það má sjá af manntalinu í Fredrikssund 1845, þegar þau hafa nýlega verið flutt þangað til þorpsins, sem þá var.            

Yngsta barnið var þá óskírt meybarn en í miðjum hópnum var níu ára drengur, sem hét Jens Willumsen eftir afa sínum - en hans kynslóð var sú fyrsta sem bar nafnið Andersen og þar með, um miðja síðustu öld, hættu Danir að kenna sig við feður sína eins og við gerum enn hér á landi. Anders Jensen, hinn eiginlegi ættfaðir, ef við miðum við Andersen-nafnið, var fjölhæfur verkmaður til sjós og lands og var orðinn lóðs um fertugt. Sonur hans, Jens Willumsen Andersen, var einnig lóðs; hann var langafi móður minnar og þeirra Andersensystkina sem við erum flest komin af og heiðrum nú um helgina. Kona hans var Charlotte Amalia Andersen, fædd Jensen.

Um fjölda barna þeirra fannst ekkert við svo snögga yfirferð sem ég varð að láta nægja á þjóðskjalasafni Dana, en þau hafa greinilega verið ung þegar þau eignuðust soninn Carl Willum Andersen, langafa minn. Fæðingarár hans og konu hans, Juliane Kristine Poulsen, hef ég ekki en þau voru bæði fædd snemma árs, Carl Willum 28. febrúar og Juliana Kristine 26 mars. Meira að segja eftirlifandi dóttir þeirra og afasystir okkar margra af minni kynslóð, Eva, sem býr í Fredrikssund og er með hressari konum, man ekki hvenær þau voru fædd. Hún sagði okkur í sumar að móðir sín, Juliana, hefði aldrei talað um svoleiðis hluti eða fjölskyldumálefni yfirleitt.

En þá erum við komin að afa og ömmu, Danska-Pétri og Jóhönnu Guðjónsdóttur. Afi var einn níu barna þeirra Carls Willums og Júlíönu og upphafsmaður fjölskyldu okkar á Íslandi. Hann fæddist í Fredrikssund 20. mars 1887 og hefði því orðið 96 ára á þessu ári. Amma fæddist tæpum tveimur árum síðar uppi á landi, 27. febrúar 1889. Af þessum níu systkinum lifa þrjú: Svend, sem býr í Reykjavík, Eva, sem býr í Fredrikssund, og Elna sem býr í Odense. Afi og systkini hans eignuðust samtals 32 börn svo við sjáum augljóslega að þótt við séum mörg hér þá eru miklu fleiri í Danmörku og Svíþjóð, því eitthvað af þessu fólki mun búa þar.            Langafi, Carl Willum, drukknaði ásamt Jörgen syni sínum 15. janúar 1934 utan við Kristianssand í Noregi við þriðja mann. Þeir voru á leið til Íslands með bát en strönduðu í vondu veðri. Lík feðganna fundust aldrei en þriðji maðurinn, lóðs frá Óðinsvéum, mun hafa fundist. Langamma lifði í ein sjö ár eftir það og hafði nóg að gera við að ala upp barnaskarann og stjórna stóru heimili. En eftir því sem Eva gamla Jespersen, eins og hún heitir nú, sagði okkur í sumar þá kvartaði hún aldrei; vol og víl var ekki stíll þeirrar konu eða langafa sjálfs - og það er það ekki enn í þessari fjölskyldu. Það má heldur aldrei verða!

Ég gerði nokkrar tilraunir til að koma á fjölskyldutengslum við danska listmálarann Jens E. Willumsen. Það tókst ekki svo óyggjandi væri en bæði onkel Theodor, Eva Jespersen og fleiri danskir ættingjar kváðu sig vita fyrir víst að þar sé sama Willumsen-nafnið á ferðinni og hér hefur verið rakið.

Því er ekki ólíklegra en hvað annað að forfaðir málarans, trúlega afi hans, hafi verið Wilum Jensen, einn sona Jens Willumssonar og Önnu Óladóttur, eldri bróður Anders Jensen, þess sama og ber ábyrgð á Andersen-nafninu. Einhverntíma skrifuðu ættingjar okkar í Fredrikssund málaranum, sem þá var búsettur í Frakklandi, og spurðu hvort hann byggi yfir einhverjum upplýsingum í þessa átt. Það gerði hann ekki - en bað að heilsa öllum hugsanlegum ættingjum í Danmörku og á Íslandi.

Og hvort við erum komin af frönskum aðalsmönnum, eins og er svo skemmtilegt að halda fram, er ekki endanlega vitað. Kirkjubækur á Þjóðskjalasafninu í Kaupmannahöfn ná ekki lengra aftur en til ársins 1787. Eldri bækur virðast hafa glatast.

En þetta er einmitt tími frönsku byltingarinnar, hún var háð 1789, og hver veit nema að t.d. foreldrar Wilums Nilausens hafi komið frá Frakklandi á þessum tíma þegar þar var mikið öngþveiti og friðsælt líf blasti við ekki mjög langt í norðri. Það er ekkert ólíkleg skýring - því mín reynsla af Andersenunum er sú að þeir séu seinþreyttir til vandræða: þetta fólk hafi einfaldlega ákveðið að fara í burtu í stað þess að standa í bardögum og aftökum.

Kannski tekst okkur síðar að róta í fleiri og eldri bókum í gamla landinu þannig að við lærðum enn frekar um uppruna okkar sjálfra - og komumst þannig eitthvað nær áleitnum spurningum um hver við í rauninni erum og hvert við stefnum.